Qazaxıstanlı prodüser Nurlan Koyanbayevlə ortaq film çəkən tanınmış türk aktyoru Kadir Doğulu, ötən gün həyat yoldaşı Neslihan Atagüllə bağlı açıqlama yayıb.
Open.az xəbər verir ki, ilk olaraq Qazaxıstanda çəkdiyi və baş rolunu ifa etdiyi filmdən danışan Kadir Doğulu, daha sonra söhbəti Neslihan Atagüllə bağlı yayılan "Dəmir Kadın Neslican" adlı filmə gətirib.

Kadir Doğulu həyat yoldaşı Neslihanın həmin filmdə çəkilməyəcəyini, amma PR xatirinə onun adından sui istifadə edildiyini söyləyib: "Filmi Ali Burak Ceylan, Serkan Günay və Kerim Altıntaş çəkəcək. "Demir Kadın Neslican" adlı filmin ssenarisi Neslihana təqdim edilmişdi. Amma Neslihan filmə çəkilməkdən imtina etdi və bunu filmin yaradıcılarına rəsmi şəkildə bildirdi. Bu mövzulu filmdə rol almaq Neslihan üçün çox ağrılıdır. Həssas mövzulara toxunmaq istəmirəm. Amma həyat yoldaşım həmin filmdə rol almayacaq. Neslihanın açıqlamasından sonra yenidən onun adından PR kimi istifadə edilir. Filmin yaradıcılarının Neslihanın adından belə açıqlamalar yayması böyük hörmətsizlikdir." deyə Kadir Doğulu bildirib.
Qeyd edək ki, bir gün əvvəl türk mətbuatında aktrisa Neslihan Atagülün xərçəng xəstəliyindən vəfat edən Neslican Tayın həyatından bəhs edəcək filmdə baş rolu oynayacağı ilə bağlı xəbərlər yayılmışdı.