Sabir Rüstəmxanlı ilə Cavanşir Quliyevdən Müşfiq ruhuna ərməğan
Tarix: 15-06-2020, 08:15




“Nəhayət bitirdim! İllərlə içimdə bəsləyib yetişdirdiyim, hər şeyə rəğmən inadla yazmaq istədiyim “Müşfiq ağrıları” orotoriyasını bitirdim!”

Dominant.az xəbər verir ki, bunu Əməkdar incəsənət xadimi, tanınmış bəstəkar Cavanşir Quliyev bildirib.

Bəstəkar saytımıza açıqlamasında qeyd edib ki, orotoriya Azərbaycanın nakam şairi Mikayıl Müşfiqin acı taleyindən bəhs edir: “Libretto Müşfiqin bütün həyatını, ona qarşı olan ədalətsizlikləri, onun sevgisini, nifrətini, haqsızlığa dözümsüzlüyünü əhatə edir. Əsərdə 6 Ağı var: Ana Ağısı, Vətən Ağısı, Azadlıq Ağısı, Söz Ağısı, Eşq Ağısı, Həyat Ağısı. Bu ağılarda şairin bütün həyatı keçir. Qaragüruh adlandırdığım 5 hissə də var ki, bunlar Müşfiqə olan hücumları, ədalətsizlikləri və nəhayət, onun ölümə göndərilməsini əks etdirir. Əsərdə şairin görmədiyi Ana obrazı da var - madam şair onu görməyib, tamaşaçı da görməyəcək - ananın səsi kulislərdən eşidiləcək. Əsərdə 3 yerdə ana müdaxilə edir - əvvəldə, ortada və ən sonda. Müşfiqin bir poemasından bir kiçik şeirə rast gəldim - "Vəfasız dünyadan eh dedi, getdi, Tez sönən ömrünə meh dedi, getdi, Gül əkdi, vay dərdi cahan bağından, Tökdüyü yaşlara şeh dedi, getdi", - sanki özü haqda yazıb...Əsər ananın ifasındakı bu şeirlə sonlanır”.

“Librettonun müəllifi Sabir Rüstəmxanlıdır. Əsər bir saat səslənir. 13 hissədən ibarətdir – proloq, 6 ağı, 5 qaraguruh, epiloq. İfaçılar – böyük simfonik orkestr, böyük qarışıq xor. Solistlər – soprano, tenor, mezzo-soprano, bariton, qadın - xanəndə, təqdimatçı”, - deyə C.Quliyev əlavə edib.






Paylaş: