Fədayə Laçınla birgə həbs olunan Hüseyn Əlixanovun bacısı oğlu Ali Məhkəməyə müraciət edib
Tarix: 2-12-2019, 17:45



Fədayə Laçınla birlikdə ittiham olunan Ceyhun Səmədov barəsindəki hökmdən kassasiya şikayəti verib.
APA-nın məlumatına görə, təqsirləndirilən şəxs cəzasının yüngülləşdirilməsini xahiş edib.
Onun şikayəti Ali Məhkəmənin hakimi Tahir Kazımovun icraatına verilib.
Qeyd edək ki, 2017-ci il oktyabrın 23-də Bakıda məhkumlar - "Qoca" ləqəbli Etibar Məmmədov və Əli Ağaminin qaçması faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində başlanan cinayət işi üzrə qaravul rəisi Ceyhun Səmədov, müğənni Fədayə Laçın və daha 9 nəfər təqsirləndirilən şəxs qismində cəlb olunub. Keçirilən əməliyyatla E. Məmmədov məhv edilib, Əli Ağami isə saxlanılıb.
Bakı Ağır Cinayətlər Məhkəməsinin hökmü ilə müğənni Fədayə Laçın 5 il, Penitensiar Xidmətin tabor komandiri Bəhruz Abdullayev 9 il, qarovul rəisi Ceyhun Səmədov 9 il, müavinləri - Tural Poladxanov 8 il 6 ay, Fuad Hacıyev 8 il 6 ay, taksi sürücüsü Məhəmməd Hacıyev 7 il, Günay Atakişiyeva 6 il, Aqil Nəcəfov 9 il, İsrafil Soltanov 7 il, Şahmar Bəyəlizadə 7 il, Tərlan Zeynalov 7 il, Anar Əsgərov 7 il və Əli Ağami (cəzaları birləşdirilib) 20 il müddətinə azadlıqdan məhrum edilib.
Bakı Apelyasiya Məhkəməsində Fədayə Laçının cəzası 2 ilə endirilib.
Bundan başqa Kanvoy Taborunun komandiri Bəhruz Abdullayevin cəzası 3 ilə, Fuad Hacıyevin, Məhəmməd Hacıyevin, İsrafil Soltanovun Tərlan Zeynalovun, Anar Əsgərovun cəzaları 4 ilə, Günay Atakişiyevanın cəzası 5 ilə, Aqil Nəcəfovun cəzası 8 ilə, Ceyhun Səmədovun cəzası 8 il 6 aya, Tural Poladxanovun cəzası isə 8 il 3 aya endirilib.
Müğənni Fədayə Laçının cəza müddəti başa çatdığından azadlığa buraxılıb.
Onu da qeyd edək ki, Ceyhun Səmədov  Ədliyyə Nazirliyi Penitensiar Xidmət rəisinin sabiq müavini, ədliyyə general-mayoru Hüseyn Əlixanovun bacısı oğludur.

Paylaş: