Yenidən evlənən Arif Alışanovu niyə qınayırlar?
Tarix: 30-07-2019, 10:23



Bu günlərdə  AzTV QSC-nin sabiq sədri Arif Alışanovun yeni ailə həyatı qurması ilə bağlı sosial şəbəkələrdə, eləcə də bir sıra mətbuat orqanlarında məlumatlar yayıldı. Məlumata görə, A.Alışanov müğənni, eləcə də “Mədəniyyət” kanalında bir müddət aparıcı kimi çalışan Ayşən Məstanova (Şakirqızı) ilə evlənib. İddialara görə, sabiq sədrin yeni xanımı ondan nə az, nə çox, düz 20 yaş kiçikdir.
Əslən Naxçıvandan olan A.Məstanova barəsində də maraqlı faktlar bildirilib. Deyilənə görə, o, hələ iki il əvvəl telekanala işə düzəlib. Mədəniyyət və İncəsənət Universitetinin məzunu olan aparıcı-müğənni əvvəllər Rusiyada yaşayan bir azərbaycanlı ilə ailəli olub və onunla olan nikahdan 1 övladı var. Həmçinin Arif Alışanovdan da bir oğlu olduğu deyilir. A.Məstanova Alışanov işdən çıxarılan gün - 2019-cu ilin 15 yanvarında AzTV-dəki işindən uzaqlaşıb.
Eksperss.az saytının yazdığına görə, Alışanovun yeni qayınanası Gülbahar Haqverdiyeva 23 aprel 2019-cu ildən Sumqayıt Təhsil Şöbəsində Metodikabinənin müdiri vəzifəsində çalışır. O, Sumqayıtda “Təfəkkür” liseyində də direktor olub. G.Haqverdiyeva Təhsil Nazirliyinin kurikulum üzrə təlimçisi, Sumqayıt Şəhər Təhsil Şöbəsi üzrə YAP ilk ərazi təşkilatının sədri, eyni zamanda Sumqayıt Şəhər YAP Siyasi Şurasının üzvüdür.
Arif Alışanov hələ Mehriban Alışanova ilə boşanmamış Ayşən Məstanova ilə isti münasibətləri  olub. Belə ki, Arif Alışanov 2018-ci ildə Ayşən Məstanovaya qara rəngdə “Mercedes-Benz” markalı bahalı avtomobil alıb. Avtomobilin qiymətinin 100 min manat dəyərində olduğu deyilir. Hətta Ayşən Məstanova AzTV-yə işə də həmin avtomobillə gəlib-gedirmiş. Həmin vaxtı Arif Alışanovun həyat yoldaşı olan Hesablama Palatasının auditoru Mehriban Alışanova bundan xəbər tutan kimi ərindən boşanmağa qərar verib. Onlar tez müddətdə məhkəməyə müraciət edərək boşanıblar. Arif Alışanovun əvvəlki həyat yoldaşı Mehriban Alışanovadan 3 qız övladı  var.

Beləliklə, Alışanovun yeni evliliyi və onun ətrafında yayılan məlumatlar bir müddətdir ki, müzakirə olunmaqdadır. Əksəriyyət  AzTV QSC-nin sabiq sədrini özündən 20 yaş xanımla evlənməsini, bu münasibətə görə əvvəlki xanımından boşanmasını qınayır və yaxud tənqid edir.

Qeyd edək ki, buna qədər bir çox tanınmış güclü cinsin nümayəndələrinin ikinci və yaxud üçüncü evliliyinə görə tənqidlərlə üzləşdiyinin şahidi olmuşuq. Məsələn, xalq artisti Niyaməddin Musayevin bir neçə dəfə ailə qurduğu barədə məlumatlar var. Hətta deyilənə görə, xalq artisti övladlarının birinin anasını analıq hüququndan məhrum edib. Bu barədə danışmağa meyilli olmayan xalq artistinin bir neçə il öncə özündən 28 yaş kiçik sevgilisi olduğu barədə məlumat yayılmışdı. Həmin sevgilisinin isə gənc ifaçı Türkan İskəndərli olduğu deyilirdi. Lakin sonradan hər iki tərəf bu xəbəri yalanlamışdı. Buna baxmayaraq, uzun müddət bu məsələ ətrafında gedən söz-söhbət səngiməmiş, 79 yaşlı xalq artisti “yeni eşq macərası”na görə tənqidlərlə üzləşmişdi.

Və yaxud xəstəlik səbəbi ilə dünyasını dəyişən reper Anar Nağılbazın ikinci dəfə evlənməsi xəbəri günlərlə mətbuatda müzakirə edilmişdi. Qeyd edək ki, reper Anjelika Cəbiyeva ilə evli olub və onlar qalmaqallı şəkildə boşanıb. Daha sonra o, Aytən adlı qızla evlənib. Bir müddət bu evliliyin yalan olduğu, hətta reperin Aytən adında, ümumiyyətlə, sevgilisi olmadığı deyilsə də, sonradan onların nikah şəhadətnaməsinin görüntüləri yayılmışdı.

“Şeron” qrupunun üzvü olan Rüstəm Zeynallı da  iki dəfə ailə qurub. İkinci dəfə ailə qurduğu Həcər xanım xalq artisti, qarmon ustası Aftandil İsrafilovun qızıdır. Həcərlə Rüstəm 2008-ci il noyabrın 11-də keçirilən toy mərasimi ilə vətəndaş nikahına daxil olublar. Onların rəsmi nikahı olmayıb. Lakin ötən il müğənninin ikinci arvadından boşandığı barədə məlumatlar yayıldı. Müğənni bu evliklərə görə bəzən sosial şəbəkə izləyiciləri tərəfindən tənqid olunub.

Amma bunun fonunda tanınmış xanım sənətçiləri var ki, onlar iki və daha çox evlilik yaşasalar da, əks cinsin nümayəndələri qədər sərt reaksiyalarla rastlaşmayıblar. Məsələn, xalq artisti Flora Kərimova 3 dəfə ailə həyatı qurub. Onun ilk həyat yoldaşı məşhur cərrah İbrahim Topçubaşovdur. Onunla tanışlığı Topçubaşovun Flora xanıma mahnı verməsi ilə başlayıb. Flora xanımın ilk evliliyi çox gənc yaşlarında olsa da, Topçubaşov ondan 20 yaş böyük olub. Onun ölümündən bir neçə il sonra azərbaycanlı biznesmen Faiq Şəfiyevlə ailə həyatı qurur. Onun bu evlilikdən bir qızı var. Faiq bəyi də yol qəzasında itirən Flora xanım 3-cü dəfə ailə həyatı qursa da, onun bu həyat yoldaşı da dünyasını dəyişir.

Əsl adı Aynurə Qəzənfərli olan Nura Suri də 3 dəfə ailəli olub. Hər evlilikdən bir oğlu olan Nura xanımın həyat yoldaşlarının tam adı məlum olmasa da, hər çıxışında həyat yoldaşlarının tanınmış iş adamı olduğunu bildirir. Onun ikinci evliliyi iranlı iş adamı Əlirza Suridir və Nura Suri ilə ayrılığı kifayət qədər qalmaqallı olub.

Eləcə də Şəbnəm Tovuzlu da 3 dəfə ailə həyatı qurub. Onun ilk evliliyi Ərşad adlı müğənni ilə olub. İkinci evliliyi Famil Xəlilov adlı biznesmenlə olub. Sonuncu və hazırda da birlikdə olduğu şəxs Hacı ləqəbi ilə tanınan biznesmendir. Bu şəxslə rəsmi nikahı olmadığı söylənilən Şəbnəm Tovuzlunun iki övladı var.

Mövzu ilə bağlı sosioloq Əhməd Qəşəmoğlu “Yeni Müsavat”a danışıb: “Hazırda cəmiyyət gündən-günə sürətlə mürəkkəbləşir, dəyərlər, baxışlar daha fərqli olur. Ümumiyyətlə, Arif Alışanov olmasın, digəri barəsində də bu mövzuda danışmaq, müzakirə etmək doğru deyil. Çünki bu, şəxsi həyatdır, ola bilsin ki, əvvəlki həyat yoldaşı ilə yaşamaq dözülməz hala gəlib çatıb və boşanıblar. Vurub bir-birini öldürməyəcəkdilər ki. Ayrılıblar və bundan sonra yenidən ailə həyatı qurub ki, bu da normaldır. Ümumiyyətlə, niyə görəsə cəmiyyətimiz hələ də buna hazır deyil. Cəmiyyətimizdə onlarla, yüzlərlə bu cür faktlar var. Çox təəssüf ki, son vaxtlar boşanmaların da sayı kəskin artmağa başlayıb. Məhkəmə işçiləri ilə söhbətləşəndə məlum olur ki, artıq yaşlı adamlar arasında da boşanmaların sayı kifayət qədər artıb. Heç kəs istəməz ki, uzun müddət bir yerdə yaşadığı insandan ayrılsın. Amma cəmiyyət elə bir sürprizlər ortaya çıxarır, ailədəki konfliktlər daha qabarıq şəkildə özünü göstərir. İllər öncə bu, yox idi, ona görə ki, ailə standartları, dəyərləri var idi, insanların ailə haqqında təsəvvürləri başqa cür idi. İndi, çox təəssüf ki, sanki ailə institutumuz zamanın axarının əlində qalıb. Cəmiyyətdə ailə institutunun  möhkəmlənməsi barədə də heç bir işlər aparılmır, addımlar atılmır. Ona görə də mən indiki vaxtda kiminsə boşanmasının, ailə qurmasının tələsik şəkildə qınanılmasının tərəfdarı deyiləm”.  
Bir faktı da qeyd edək ki, tanınmışların 2 və daha çox nikaha girməsi artıq adi hal kimi qarşılansa da, ictimaiyyətin özündə bu məsələyə fərqli yanaşma var. Belə ki, hələ Sovet dövründən bu günə qədər ailəsini itirən və ya boşanan qadının növbəti dəfə ailə qurması heç də müsbət qarşılanmır. Qadın ikinci dəfə ailə qurduqda bəzən qınaqlara, suçlamalara, basqılara məruz qalır. Cəmiyyətdə kök salan stereotiplərə, düşüncə tərzimizə görə, qadın fədakar, dözümlü olmalı, anadırsa öz həyatını qurmamalı, yalnız öz övladına görə yaşamalıdır. Araşdırmalar onu göstərir ki, ictimaiyyətdə boşanan kişilərin yenidən evlənmə nisbəti qadınlarla müqayisədə daha çox və tezdir. Məsələn, 2017-ci ilin statistikasına görə, Azərbaycanda 4502 boşanmış 703 dul kişi, 2353 boşanmış 168 dul qadın ailə qurub.
Boşanaraq yenidən ailə quran kişilər daha çox 30-34 yaşlılar, dul kişilər isə yaşı 60-dan çox olanlardır. Qadınlara gəldikdə isə, yenidən nikaha daxil olan boşanmış qadınlar daha çox 25-29 yaşlılar, dul qadınlar isə 50-59 yaşda olanlardır.

Paylaş: