Nərgiz Cəlilova sevgili olduğu tələbə yoldaşı haqqında: “25 ildən sonra mənə...”
Tarix: 4-12-2018, 10:35




Tanınmış aparıcı Nərgiz Cəlilova universitet illərində yaşadığı məhəbbət hekayəsindən danışıb.
Publika.az xəbər verir ki, 58 yaşlı aparıcı məşhur zərgərlik butiklərindən birinin hazırladığı “Etiraflar” layihəsinin qonağı olub. Mətbuata müsahibə verməyi sevməyən Nərgiz Cəlilova ilk dəfə olaraq şirkətin çəkdiyi layihədə gözlənilməz açıqlamalar edib:
“Universitetin birinci kursunda oxuyarkən tələbə yoldaşımla isti münasibətlərimiz yaranmışdı. Yaşımıza uyğun olaraq çox yaxşı, çox saf və çox təmiz münasibətlərimiz var idi. Dostluq münasibətlərimiz sevgiyə çevrildi. Qərar verdik ki, dördüncü kursda nişanlanaq, bitirəndən sonra isə evlənək. Onu bir gün tələbə düşərgəsinə göndərdilər. Oradan qayıdanda onda dəyişiklik gördüm, artıq o münasibətləri davam etdirə bilmədik və ayrıldıq. Acılı ayrılıq yaşadım, amma o zaman bu, tələb olunurdu.
Televiziyada çalışmağa başladığım illərdə bir gün mənə zəng gəldi. Bu zəng həmin tələbə yoldaşımdan idi. Etiraf edirəm ki, ayrıldığımız illər ərzində səbirsizliklə onun zəngini gözləyirdim. Zəngində bildirdi ki, mənimlə görüşmək istəyir. Görüşdük və mənə evlilik təklifi etdi. Əvvəlcə razılaşdım, adət-ənənələrə uyğun olaraq elçi gəldilər. Bir neçə gün keçdikdən sonra hiss etdim ki, daha əvvəlki duyğuları yaşaya bilmirəm. Bunu ona izah etdim, biz razılaşdıq və ayrıldıq. Daha sonra o, ailə qurdu və Amerikaya köçdü.
25 il sonra həmin insandan mənə yenidən zəng gəldi. Onda mən də, o da öz həyat yoldaşlarımızdan ayrılmışdıq. İkimiz də subay idik. 25 ildən sonra o, yenə də evlilik təklif etdi. Təbii ki, qəbul etmədim. Çünki axar suya ikinci dəfə girmək olmaz. Bu, mənim xasiyyətimdir. Bir neçə il keçdikdən sonra o, ikinci dəfə evləndi, mən isə hələ də təkəm. Hərdən fikirləşirəm ki, ilk məhəbbətim məni rahat buraxmadı”.







Paylaş: